Quelle-meersunik nunatsinnit allatsitsisoqarsinnaajunnaarpoq
Allatsitsivissanik qalipaatigissaaqisunik ussernartorsiornartorpassuarnillu neqerooruteqartartunik, Tysklandimi allatsitsisarfimmit Quelle-meersunik Nunatsinnit allatsitsisoqarsinnaajunnaarpoq.
Allattoq Elisa Isaksen
oktobarip 20-at 2009 06:53
Allatsitsisarfissuarmi taanna maanna matuneqarpoq allatsitsivigineqarsinnaajunnaarlunilu.
Quelle-mi sulisut 10.500-uusut ullumikkut nalunaarfigineqarput, suliffeqarfissuup allatsitsisarfiup taassuma, ukiuni 82-ini atuutereersup, pisisussaanik nassaartoqarsinnaanngitsoq. Allatsitsisarfik taanna Nunatsinnit ukiorpassuarni allatsitsivigineqartaraluarpoq.
Quelle - 1950-ikkunni Tysklandimiut pissarissaarnerulernerannut atuisutullu atuinerugaluttuinarnerannut takussutissaalluartoq - piffissami sivitsortumi pisisussarsiuunneqaraluarpoq, pisiumasinnaasumilli nassaartoqarani.
Suliffeqarfissuaq taanna ajornartorsiulerpoq, pisisartut amerliartuinnartut internetikkut ullutsinni pisiniartalernerat, kingusinaarlutik iliuuseqarfiginiarsarigamikku.
