Quebecimi indianerit uranimut akerliusut
Inuusuttut maanna Lac St Jean-ip eqqaanut pisimapput 350 kilometerit pisoreerlugit. Aqqutaa tamaat tikilluaqqulluarneqartarput nerisassanik unnuiffissaminnillu tunineqartarlutik. Suli sapaatit akunneri marluk pisussapput Montrealimut apuutsinnatik.
Akerliussutsimik takutitsilluni ingerlaaqatigiinnissamut isuma pilerpoq Cree indianerit uranisiortoqarnissaa akerlerimmassuk tamannalu ersarissumik Quebecimi naalakkersuisunut takutikkusukkamikku. Nunami eqqaanni aatsitassarsiorfiit allat akuerisimavaat, ilaatigut kuultisiorfik, uranili ulorianarpallaarnerarlugu uranisiortoqarnissaa qaquguluunniit unitseqqullugu kissaateqarput.
Erngup mingutsinneqarsinnaaneranit "kingunerusinnaasut annilaarnartutut" taasaat Cree indianerit inuusuttaasa aarleqqutigigaat Cree indianerit oqaaseqartartuat, høvdingi Amy Linton, tusagassiortunut oqarpoq.
Aatsitassarsiorfik Strataco Resources Mistissinip tasiata, Quebecimi tatsit annersaata, avannaani uranisiorusuppoq.
- Taseq taanna nunaqarfitta pinngitsoorsinnaanngilaat, Quebecimullu tamarmut pinngortitami naliliulluni, Amy Linton oqarpoq.
Innu indianerit sumiiffiup ilaani aamma najugallit akerliunermut tapersiipput. Høvdingi, Gilbert Dominique, tusagassiortunut oqarpoq Innu indianerit Cree indianerit inuusuttai isumaqatigilluinnaraat, Innu indianerillu namminneq akerliunertik tusartinniarlugu BAPE-mut, uranisiortoqarsinnaanissap akuerineqarnissaanik inerteqqutiginissaanilluunniit aalajangiisussamut, allagaqarsimapput.