Qorlortorsuaq isumaqatigiinngissutaavoq
Energikonsortiep suliaq nammassinerarpaa illuatungaanilu Nukissorfinnit taama isumaqartoqarnani.
Nukissorfiit pisortaat Svend Hardenberg oqarpoq sanaartugassatut isumaqatigiissutigineqarsimasut malinneqarsimanngitsut. Taamaattumik Energikonsortiemit naammassineqarsimasutut tunniunniarneqartut isumaqatigiissuteqarfigisinnaanagit naqissuserpaa.
- Ullumikkut inissisimanerput naapertorlugu immitsinnut ungasissorujussuuvugut, aamma tunniutiinnarnianngilagut, suliaq akueriumanngilarput tigujumanagulu, Svend Hardenbegr oqarpoq.
Energikonsortiep naammagittaalliutini tunngavilersorlugu allaganngorlugu tunniutereerpagu, suliaq eqqartuussisutigut suliarineqalissaaq.
Suliap ingerlanerani Narsami Qaqortumilu innuttaasut eqqorneqartussaasut Sven Hardenberg aamma oqarpoq, innaallagissiorfiup ingerlanniarneqarnera ajornartorsiortassammat.
Erngup nukinga atorlugu nukissiorfittaaq Qorlortorsuaq pisortanit suli tigujumaneqanngitsoq, sapaatip-akunnerani kingullermi Attaveqarnermut, Avatangiisinut Aatsitassanullu Naalakkersuisumit, Kim Kielsenimit Naalakkersuisoqatigiinnut ilisimatitsissutigineqarpoq.
