Qitsuup taassuma marlunnik ukiullip Amerikami Rhode Island-imi utoqqaat illuanni najugallit ilaat qaquGu toqussanersoq nakorsanilluunniit nalunnginnerusarpaa.
Utoqqaat illuanni najugallit napparsimasut anerninginngitsiarneranni Oscarip ornittarsimavai, katillugit 25-riarluni taamaalioreersimalluni.
Nakorsaq David Dosa atuagassiamut New England Journal of Medicine-mut taama oqaluttuarpoq. Utooqqat illuanni Steere House Nursing and Rehabilisation Centre-mi pissutsit David Dosa-p misissorsimavai. Utoqqaat illuat taanna Rhode Islandimiippoq.
Doktor Dosa oqaluttuarpoq, Oscar utoqqarnut pulaarsimagaangat qanigisaat kalerrittalersimagitik, Oscarimi pulaareeraangat nalinginnaasumik nalunaaquttap akunneri sisamat qaangiukkaangata utoqqaat toqusarsimapput.
- Ilaqutaasorpassuit Oscarip pissusaa tuppallersaatigisarpaat. Qanigisatimmi toqulersut qitsuup najuunnermigut tuppallersartarsimassammagit.