Qitserarneqarlutik inuluugineqarput

Angutaannaat arnaannaalluunniit atoqatigiittarnerisa eqqartornissaa Kalaallit Nunaanni paqumigineqarpoq.

Angutaannaasartut arnaannaasartullu Kalaallit Nunaanni akerartugaapput inuluugineqarlutillu. Taamaattumik amerliartuinnartut artornaraluaqisoq Danmarkimut qimaaginnarnissartik qinertarpaat. Angutaallunilu HIV-eraanni immikkoortitaalluni persuttagaallunilu inuusariaqarpoq. Københavnimi Kalaallit Illuanni sulisoq Mikael Fleischer aviisimut politikenimut oqarpoq Kalaallit Nunaanni anguteqammik atoqateqartartut quiassuaatigineqartaqisut, malersugaasut inuluugineqaqisullu. – Taamaattut Kalaallit Nunaanni allatulli inuusinnaannginnamik Danmarkimut qimaasariaqartarput, Mikael Fleischer oqarpoq.

Billy Birkholm anguteqatiminik atoqateqartarpoq HIV-rlunilu. Billy Birkholmip HIV-ernini ammasumik eqqartorusussimagaluarpaa paasineqarusulluni. –Ukiulli arfineq-marluk matuma siorna nappaatiga tamanut oqaluttuarigakku, inuit sakkortoorujussuarmik qisuariarput; allaat aneertillunga ujaqqanik milloorneqartarpunga, saassunenqartarpunga qitserarneqarlungalu, Billy Birkholm oqarpoq.

Erik Olsen, Nuummi najugaqartoq oqarpoq Kalaallit Nunaanni illoqarfinni minnerni anguteqatiminoortartut arnaqatiminoortartullu malersuugaanerusartut. Ukiualunnguit matuma siorna anguteqatiminoortartut arnaqatiminoortartullu peqatigiiffiat ”Qaamaneq” Erik Olsenip allartikkaluarpaa. Erik Olsenip malersugaaneq inukkutigisaanerlu misigisarsimanerarpai. – Anguteqatinnoortarnera nassuerutigigakku inuit ilaasa alarpaannga, Erik Olsen oqarpoq.

Peqatigiiffik ”Qaamaneq” ilaasortassaaleqimmat siorna unitsiinnarneqarpoq.