Qitornavissiartaarsinnaanissaat tapersersorniarpaat

Arnaqatiminnik anguteqatiminnillu atoqateqartartut qitornavissiartaarsinnaalernissaat folketingimi partiinit amerlanerussuteqartunit tapersersorneqarpoq, Nunattalu ilaasortaatitai siunnersuummut tapersersuiniarput.
Allattoq Mads Lynge
decembarip 20-at 2007 10:52

Siunnersuut Radikale Venstremeersumit Simon Emil Ammitzbøllimit 2008 aallartisimalaaginnartoq saqqummiunneqassamaarpoq. Siunnersuut pingasoriarluni taasissutigineqareerpoq, amerlanerussuteqartunilli tapersersorneqartarsimanani. Pissutsilli massakkut allaapput.

Pia Christmas Møller, konservativit sinnerlugit ilaasortatut qinigaanermi kingorna attaviitsutut inissittoq, siunnersuummut tapersiiniarluni Kristeligt Dagbladimut oqaaseqarpoq.

Arnaqatiminnik anguteqatiminnilluunniit atoqateqartartut akisussaassuseqarlutik inuusut, meeqqanik atugarliortunik angajoqqaarsianngortinnissaat ikiuinngitsoornermiit pitsaanerusoq taassuma oqaatigaa.

Meeqqat pisariaqartitaat pingaarnerutinneqarnissaat Pia Christmas Møllerip oqariartuutigaa.

Liselott Blixt, Dansk Folkepartiimeersoq, oqarpoq ataataqarnissaq anaanaqarnissarlu meeqqap pisariaqartikkaa, erseqqissaatigaluguli arnaqatiminnik anguteqatiminnilluunniit atoqateqartartut isorinnginnamigit.

Arnaqatiminnik anguteqatiminnilluunniit atoqateqartartut qitornavissiartaarsinnaanissaat eqqarsarnartoqartikkitsik, Kinap, Indiap aamma Colombiap oqariartuutigereerpaat.

Suiaassuseqatiminnilli atoqateqartartut allatut periarfissaqarput. AC Børnehjælpimi pisortaq Jørgen-Ulrich Raunskov oqarpoq, meeqqat Danmarkimeersut qitornavissiartaarineqarnissaat aaamma periarfissaasoq.

Meeqqat Danmarkimeersut ukiumut 30-t tikillugit amerlassusillit qitornarvissiassanngortinneqartarput. Konservativit Venstrellu ilaasortaatitatik apeqqummut tassunga qanoq isumaqarnerlutik nammineq aalajangissagaat siuttuisa oqaatigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq