Qiteriaatsip pitsanngorsaaviginissaa uummarissarnissaalu isumaqatigiissuteqarnikkut qulakkeerniarneqarpoq
Kulturikkut illorsuaq Katuaq Nuummiittoq Qiajuk Studio & Productionilu suleqatigiillutik Nunatsinni qitinnermik aallutaqarnissamut atugassarititaasunik pitsaanngorsaaniarlutik isumaqatigiissimapput. Qiajuk Studio & Production qitittarfiuvoq Nuummi angerlarsimaffeqartoq, meeqqat inuusuttullu ineriartornissaat isiginiarlugu. Anguniarpaalu qitseriaatsit assigiinngiiaarnerusut, ilinniartitsisinnaasullu katersornissaat.
Allattoq Peter Troelsen, Simon Uldum
oktobarip 31-at 2013 08:26
Qiajuk Studio & Production pikkorissaanerit ilinniartitsinerillu isiginiarlugit ilaatigut makku samminiarpaat: Uaajeerneq, tivaneq, balletti, contemporary, breakdance aammalu Hip Hop. Katuamik suleqateqalernerup siunertaraa qitinnernik takutitsinerit Katuami ingerlanneqartarnissaannut periarfissaqarnerulernissaq. Isumaqatigiissut ukiuni pingasuni atuuttussaq novembarip aallaqqaataani atuutilissaaq.
- Nuannaarutigaarput qujamasuutigalugu Qiajuk Katuami aaqqissuussisarnissanut ilanngussinnaammat. Suleqatigiinnerput meeqqanut inuusuttunullu qitinnermik soqutigisalinnut periarfissanik ammaassivoq, taama ilassuteqarpoq Ruth Montgomery-Andersen, Qiajuk Studio & Productionimi piginnittuusoq.
