Qissiat aamma Nordisk Koncertkor tusarnaartitsilersut
Erinarsoqatigiit Qissiat Nordisk Koncertkorikkullu ataatsimoorlutik ukioq manna sapaammi novembarip ulluisa 15-ianni tusarnaartitsiniarput. Aatsaat siullerpaamik erinarsoqatigiit taamatut suleqatigiillutik tusarnaartitsissapput.
Neriorsorsinnaavatsigillu nuannersumik misigisaqartikkumaarlusi.
Erinarsoqatigiit assigiinngitsunik erinarsuutinik atuissapput, tulleertut sisamaassallutik.
- Erinarsoqatigiit marluullutik assorsuaq nuannersumik suleqatigiissimapput, qilanaaqaagullu suleqatigiinnitsigut angusagut tusartissallugit, Qissiat siulittaasuat Emile Mølgaard oqarpoq.
- Assorsuaq nuannerpoq Qissiat erinarsoqatigalugit. Taakkumi angutit erinarsoqatigiit pikkorissorsuugamik! Nordisk Koncertkor siulittaasua Naja Demant-Poort oqarpoq.
Tusarnaartitsineq Ilinniarfissuup katerisimaartarfiani, Qassimi, sapaammi novembarip 15-iani ingerlanneqassaaq, isernerlu akeqassanngilaq.
