IWC-mi ilaasortat amerlanersaasa Kalaallit Nunaata qipoqqarnik pisaqaqqittalernissaa tapersersunngilaat.
Tikaagulliusaat tikaagulliillu ullumimut pisarineqarsinnaasut annikinnerpaaffimmiittut amerlaqataasa pisarineqarsinnaanissaat nunarput sinnerlugu isumaqatiginninniartut naatsorsuutigaat. Aalajangiinissarli ippassaq anguneqanngimmat kalaallit arfernik qassinik sorlernillu pisassinneqassanersut ullumi aatsaat aalajangiivigineqassasoq, suleqaterput Else Løvstrøm Anchoragemiit nalunaarpoq.
Qipoqqaat arfiviillu nunatsinni amerliartuinnartut tusarliunneqarmat ataatsimeersuartut ilaannit tupaallaatigineqarpoq, Kalaallit Nunaatalu avataani ilumut arfiveqarlunilu qipoqqarnera, ilaasortat ilaasa aatsaat paasinerarpaat.
Qipoqqaat pisarineqarnissaat ilimanarunnaarpasereerpoq, ullumili aalajangiivinnissamut nunatsinniit piumasaqaatit sinnerisa piviusunngortinneqarnissaat neriunaateqarpoq. Nunat assigiinngitsut piumasaqaatitik nunatsinnit akuersaarneqarsinnaassappata tapersersuillutik taaseqataasinnaallutik saaffiginnillattaarmata.
Qipoqqaat pillugit paasissutissat biologinit ukiuni makkunani katersorneqaleruttorput amerlisimanerannullu uppernarsaatit ersarinnerusut ukiup tulliani saqqummiunneqarpata pisassiisoqarsinnaanissaa neriuutigineqarpoq.
Siunnersuutit akuerineqassagaangamik taasisinnaasut 75 procentii akuersaartussaapput, nunattalu piumasaqaataat ilaatigut tikaagullinnik 25-nik amerlanerusunik pisassinneqarnissaq arfivinnillu pisassiisoqarnissaa anguneqassanersoq ullumi paasinarsissaaq. Suleqaterput Else Løvstrøm Anchoragemiit nalunaarpoq taasisinnaasut affaasa missaannaat taaseqqaarnermi kalaallit piumasaqaataannut ippassaq tapersersuisimasut.
