Qipoqqarniartalernissaq siunniuppaat

Arfattassat isumaqatiginniutaalerpata Namminersornerullutik Oqartussaniit neriuutigineqarpoq qipoqqaat ukiuni 21-ni eqqissisimatitaasimasut ukiup tullianiit pisarineqarsinnaaleqqissasut.

Imaassinnaavoq una erinarsuut atussallugu tulluutileqqissasoq, taamaattoqassappalli arfanniutitoqqap Sunniap qipoqqaat sinerissami illoqarfinnut arlalinnut tulaassinnaanavianngilai.

Namminersornerullutillu Oqartussat sinnerlugit isumaqatiginninniartussat una qaammat naalerpat Anchoragemi arfattassat pillugit isumaqatiginninnialerpata tikaagulliit tikaagulliusaallu kisiisa isumaqatiginniutiginavianngilaat, qipoqqaat qulit pisarisinnaanissaat aamma isumaqatiginniutigisussaagamikkit.

Tamatumunnga peqqutaavoq arferit illernartortaannik taaneqartartut qipoqqaat massakkut ima amerlitigisimammata allaat aningaasarsiutissatut pisarineqarsinnaanngussallutik.

Qipoqqat ullumikkut ima amerlatigaat allaat umiatsiaaqqanik ajunaartitsisinnaalernikuullutik, Finn Karlsen piniarnermut naalakkersuisoq ualeq oqarpoq.

Nunatsinni Pinngortitaleriffimmi biologit allaat nalilersimavaat pisassat amerlassusaannut ajoqutaanngitsumik qipoqqaat 30-it ukiuni tulliuttuni tallimani pisarineqarsinnaanissaat, Piniarnermut pisortaqarfiup immikkoortortaani pisortaq Ole Heinrich KNR-mut oqarpoq.

Maannakkulli tassa mianersortumik aallartilluni qulinik pisassiinissaq piumasaqaatiginiarneqarpoq.

Qipoqqaat saniatigut tikaagullit aqqaneq marluk tunumi pisassiissutigineqarnerisa saniatigut kitaani 175-it pisarineqarsinnaanissaat kiisalu tikaagulliusaat 19-it pisassiissutigineqarnissaat anguniarneqarpoq. Taakkualu ukiup tullianiit 2012 ilanngullugu pisassiissutissatut anguniarneqarput.