Qinnuteqarnissamut ulloq kingulleq
Ilinniagaqalerumasut qinnuteqarnissamut suli tassa piffissaqarput.
Ilinniagaqarniartunut qinnuteqarfissaq kingullerpaaq tassa ullumi, ilinniagaqarnissamullu qinnuteqaaterpassuarnik sinerissami Piareersarfiit suli tigooqqaapput.
Qinnuteqaatinik Nuummi tigooqqaasoq, Piareersarfimmeersoq, Susanne Møller oqarpoq, qinnuteqartut arlalissuit paatsoorsimagunartut tassami, ippassaq tunniussiartortut imaaginnavissimammata.
- Kisianni qinnuteqarfissaq kingulleq tassa ullumi, Nuummilu ualeru sisamanut matussaagut, kisiannili matunerup kingorna qinnuteqaatinik aamma tunniussisoqarsinnaassaaq.
Ilinniagaqarniarluni qinnuteqarnermut ullumi ulloq kingulleq, nunatsinni ilinniarfinnut assigiinngitsunut atuuppoq, tassanilu pineqarput, ilinniarnertuunngorniarfiit, GU, HHX aamma HTX, taakku saniatigut peqqissaasunngorniarfinnut, inunnik isumaginninnermut ilinniarfinnut, ilinniakkanullu ingerlaqqiffiusunut, soorlu Ilisimatusarfimmut Ilinniarfissuarmut aammalu Tusagassiornermik Ilinniarfimmut atuulluni.
Nunani allani, soorlu Danmarkimi ilinniagaqarnissamut qinnuteqaat ilinniarfissatut toqqakkamut nassiunneqassaaq, ilinniagaqarnersiuteqarnissamullu qinnuteqaat kalaallit illuannut ilinniarfissamiittumut nassiunneqassalluni.
Qinnuteqarnermi paatsuugassuteqaraanni najukkami Piareersarfik saaffigineqarsinnaavoq.
Ilinniagaqarniarlutit qinnuteqarnissat suli tassa angumerisinnaavat, qinnuteqassaguit illoqarfigisanni nunaqarfigisanniluunniit atuarfeqarfimmut imaluunniit Piareersarfimmut saaffiginnissaatit. Inuussutissarsiutinut tunngaviusumik ilinniarfinnut ukioq kaajallallugu qinnuteqartoqartarpoq.
