Qinngasaaruttarneq iliuuseqarfiginiarpaat

Suliniummik aqutsisussat sumiiffinni ataasiakkaaneersut aningaasaateqarfiup Mary Fondip suliniutaata 'Qinngasaaruttarneq unitsilli'-mik taagorneqartup Nunatsinni pissutsinut naleqqussarneqarnissaa isumagissavaat.

- Peqatigiilluta suliniutip Kalaallit Nunaanni atorneqalernissaa neriuutigaarput, taamaalilluta kalaallit meerartaasa atugarissaarnerullutik toqqissisimanerullutillu peroriartorsinnaanissaat peqataaffigisinnaaniassagatsigu. Suliniummi meeqqat ataatsimoornerminni tunngaviusumik pingaartitaat pingaartillugit sammineqarput, taamalu atuarfimmi atualerlaanullu iluarsaaqqinnermi sulianut naapertuuttuullutik, aningaasaateqarfiup siulittaasua, kunngissap nulia Mary oqarpoq.

Suliniummi ilaatinneqarput inooqatigiinnermut tunngasut perorsaasut, ilinniartitsisut angajoqqaallu meeqqat suleqatigiissinnissaannut ataatsimoorussaqarnissaannullu atorsinnaasaat.

Misissuinerup "Kalaallit Nunaanni meeqqat" ersersippaa, meeqqat pingajorarterutaasa missaat qinngasaarneqartarnermik avataaniittutullu misigisimanermik ajornartorsiuteqartut.