Qinikkat tatigineerussinnaapput
-Uagut isumaqarpugut taasissussisarsimaneq ajortorujussuusoq, taamatut pisoqartussaanngikkaluarmat aallaqqaammut. Tamakkua kinguneqartinneqarneq ajormata, naak inatsisiliorneq pissaaneqarnerlu akimanerpaatut ataqqinartutut isigineqartussaagaluartut atornerlunneqarpata demokratiimik paasinnittariaaserput innarlerneqassaaq. Soorlu imatut eqqarsalertitsisinnaalluni; qanoq ilioraluaruttaluunniit kingneqarnaviangilaq aammami politikerit taamaaliorput. Ataqqinassuseq katakkiartorpoq, politikkimut pularusuneq, politikimillu soqutiginninneq appariartorsinaapput. Tamanna assorujussuaq ajuusaarnarpoq, piffissami matumani taama nukinnik nutaanik amigaateqartigaluta, Atuagalliutini akisussaasuuneq, Inga Dora Markussen taamatut oqarpoq.
Sociologi, inuiaqatigiit iluanni pissutsit pillugit immikkut ilinnarsimasoq, Maliina Abelsen oqarpoq, taasissussisarsimaneq kisiat eqqarsaatiginagu aammali soorlu pisortat akikitsunik illutaartarsimanerat eqqarsaatigalugu innuttaasut demokratiimik paasinnittariaasaannik, politikerinillu tatiginnissinnaanerannik innarliisussaasut. Demokratii Nunatsinnut eqquniartillugu soorunami tusiapillaasoqartarsinnaavoq, taamali ersaritsigisunik peqquserlunnertut taaneqarsinnaasunik pisoqaraluaraangat kinguneqartinneqartannginnerat assut uggornartoq, Maliina Abelsen oqarpoq. Soorluuna politikerit ilaasa qinersisartut ataqqinerunissaat puigupallattaraat. Taassumalu massa malitsigisussaagaa pissuserissaarneq. Demokratiip atorunnaarsinneqartutut isigineqalertarsinnaanera innuttaasut politikerinik tatiginnikkunnaarnermik kinguneqassaaq. Taakkualu tassaapput nunap aqunneqarnerani ajornerpaamik kinguneqarsinnaasut. Peqquserlunnertut pissusilunnertullu taaneqarsinnaasut kinguneqartinneqartanngippata pissutsit ajortikkiartuinnarsinnaanerat aarleqqutigineqalissaaq, Maliina Abelsen oqarpoq.
