Qinikkat inatsisartuni ilaasortaasinnaanerat misissorneqarpoq
- Inatsisartuni ilaasortaq akiliisitaasimappat arlaatigulluunniit inatsisinik unioqqutitsisimappat, tamanna Inatsisartuni ilaasortaasinnaannginnermik kinguneqassanersoq Inatsisartut ataatsimut aalajangissavaat, Inatsisartut allaffeqarfianni atorfilik, Kent Fridberg oqarpoq.
Inatsisartunut qinigaasut pineqaatissinneqarsimanerat akiliisinneqarsimaneralluunniit ikinnerpaamik ukiut tallimat matuma siorna pisimagaangat sunniuteqartinneqarneq ajorpoq. Kisianni soorunami qanorpiaq inatsisinik unioqqutitsisimanersoq apeqqutaassaaq.
- Inatsisartunut qinigaasut inatsisinik unioqqutitsisimanerinut uppernarsaatit tamarmik tiguneqareerpata, Inatsisartuni sivisunerpaamik ilaasortaasimasoq, Josef Motzfeldt ataatsimiititalimi ilaasortanik qaaqqusissaaq, juunip aqqaneq aappaani Inatsisartut katersuuppata innersuussutissat piareersimasussaammata, Inatsisartut allaffeqarfianni atorfilik, Kent Fridberg oqarpoq.
