Assi: Tusagassiivik

Kingumut qiviarneq: Qinigassanngortittut arlallit siornatigut mamianartuliorsimasut

Inatsisartunut qinigassanngortittut arlalissuit siornatigut nakuusersimaneq akileraartartullu aningaasaataannik atornerluineq pissutigalugit allaaserineqartarsimapput.

Inatsisartunut marlunngormat qinersinermi 231-t qinigassanngortipput. Taakku ilarpassui siornatigut iliuuseqartarsimapput politikkikkut suliaqarnerminnut kingunerlutsitsisimasunik.

Pisimasullu pisoqaassusii malillugit ataani tulleriiaarneqarput:

Folketingimut ilaasortap Aleqa Hammondip Folketingimit kreditkorterisani atorlugu atorfimminut attuumassuteqanngitsunut 13.000 koruunit nalinginut  pisiortorsimanera Folketingip Aningaasaqarnermut allaffeqarfianit 2016-imi uparuarneqarpoq. Aleqa Hammond naapertorlugu kontumi iTunesimit atornerlunneqarsimaneri tamatumunnga pissutaavoq.

AAMMA ATUARUK Aleqa Hammond: Aninissara nammineq toqqarpara

Tamatuma uparuarneqarnerata kingorna aningaasat utertinneqarput, pisorli Aleqa Hammondip Siumumit ilaasortaajunnaarsinneqarneranik kinguneqarpoq.

Hammondip ukiut marluk sioqqullugit Naalakkersuisut siulittaasuattut tunuartariaqariaqalerpoq, taamani aningaasat nunatta karsianeersut 100.000 koruunit missaanniittut atorlugit atorfimmut tunngassuteqanngitsunut atorneqarsimanerat Inatsisartut Kukkunersiuinermut ataatsimiititaliaannit uparuarneqarmat.

Aningaasat pineqartut ukiup affaa qaangiummat nunatta karsianut utertinneqarput.

Qinigaasinnaatitaaneq

Inatsisartunut qinigaasut qinigaasinnaatitaanerat Qinigaanerup Misilinneqarnissaanut Ataatsimiititaliap Inatsisartut ataanniittup aalajangertarpaa.

Inatsisartunut ilaasortaq qinigaasinnaassusiiagaasinnaavoq, pisumi inuup nalinginnaasumik isigineqarnermini Inatsisartunut ilaasortaanermini ataqqinaataaruppat inaarutaasumik eqqartuussummik akiliisinneqarnermilluunniit akuersissuteqarnermik pinerluttulerinermi inatsisit tunngavigalugit pineqaatissinneqarsimaguni..

Najoqqutarisaq: Inatsisartut Naalakkersuisullu pillugit Inatsisartut inatsisaat 2010-meersoq

Naalakkersuisunit nammineerluni tunuartoq

Peqqissutsimut attaveqaqatigiinnermullu naalakkersuisuusimasup Steen Lyngep nunatta karsianut 47.547 koruuninik akiligassaqarnera 2014-imi saqqummiunneqarpoq. Tamatuma Inatsisartut Kukkunersiuinermut ataatsimiititaliaannit uparuarneqarnerata kinguninngua aningaasat utertillugit akilerneqarput.

Steen Lynge kingorna naalakkersuisutut tunuarpoq. Demokraatit sinnerlugit tamatumuuna qinigassanngortippoq.

AAMMA ATUARUK Unnerluutiginnittoq: Nunatta karsianik atornerluineq unittariaqarpoq

Nikku Olsen Partii Inuit sinnerlugit 2013-imi qinigassanngortikkami taaguunneqartupilussuuvoq. Aapparisimasaminulli 2005-imi nakuusersimanini pillugu suliaq eqqartuussissutitaqanngitsumik isumaqatigiissuteqarnermik 2008-imi kinguneqartoq pissutigalugu, Nikku Olsen Qinigaanerup Misilinneqarnissaanut Ataatsimiititaliamit Inatsisartuni qinigaasinnaanngitsutut nalilerneqarpoq.

Nikku Olsen kingorna Partii Naleqqamut nuuppoq, partiilu taanna sinnerlugu maanna qinigassanngortilluni.

Inatsisartunut 2009-mi juunip qaammataani qinersinissaq sioqqutilaarlugu, taamani naalakkersuisut siulittaasorisaat Hans Enoksen, Atuagagdliutini allaaserisani ataatsimut qulequtserneqarsimasuni "Nuimasut piisaarnerat" allaaserineqarpoq. Naalakkersuisunut ilaasortat arlallit pisortat aningaasaataat atorlugit ilaatigut neriniartarfinni akisuunik nerisarsimanerat, imerniartarfinniittarsimanerat, timmisartumik immikkut attartortoqarsimanera Hawaiimilu ilassinninnermut qaaqqusisoqarsimanera aviisimit qulaajaaffigineqarpoq.

Atornerluisoqarsimaneranik saqqummiussisoqareersoq innuttaasut ilaat politiinut suliassanngortitsivoq, Hans Enoksenillu qinersinermi ajorsarnerminut Atuagagdliutit ilaatigut pisuutippaa.

Hans Enoksen pineqaatissinneqarsimanngilaq naluneqanngitsutullu Partii Naleqqami siulittaasuulluni ullumikkut qinigassanngortippoq.

Atornerluisimanini pissutigalugu inissiisarfimmittussanngortinneqartoq

Ineqarnermut Attaveqaqatigiinnermullu Siumut sinnerlugu naalakkersuisuusimasoq Jens Napaattooq Namminersornerullutik Oqartussat ilassinninnissamut kontuat atorlugu atorfimminut attuumassuteqanngitsunut 128.000 koruuninik atuisimanini pissutigalugu Naalakkersuisunit tunuartitaavoq.

Jens Napaattooq akileraartartut aningaasaataannik atornerluisimanini pissutigalugu qaammatini sisamani  pineqaatissinneqarsimasunut inissiisarfimmiittussanngortinneqarluni 2007-imi pineqaatissinneqarpoq. Qinersinermi matumani Partii Naleraq sinnerlugu qinigassanngortippoq.

AAMMA ATUARUK Rasmus Frederiksen nægter at betale

Siumup naalakkersuisuutitaqarnerani pineqartumi, taamanikkut aalisarnermut naalakkersuisuusoq Rasmus Frederiksen neriniartarfimmi nerinermut imigassartornermullu ilassinninnissamut aningaasartuuteqarsimanini pissutigalugu naalakkersuisutut 2005-imi tunuarpoq. Aningaasartuutit ukiup ataatsip ingerlanerani 160.000 koruunit sinneqartut pineqarput.

Rasmus Frederiksen politikkimut uterusulluni Inatsisartunut 2005-imi qinigassanngortinniaraluarpoq, Siumulli sinnerlugu qinigassanngortinnissaa partiimit taamani itigartitsissutigineqarpoq. Qinersinermili matumani Siumut sinnerlugu qinigassanngortippoq.

Qinigaanerup Misilinneqarnissaanut Ataatsimiititaliaagallartoq qinigaasut tamaasa pillugit apriilip 24-ata kingorna inassuteqaateqassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat