Qinigaasinnaanngitsutut naliliiffigineqareerluni qinigassanngorteqqittoq

Apriilip arfineq pingajuanni kommunimut qinersinissamut Atassutip Jensine Berthelsen qinigassanngortippaa. - Ilimanarporli Jensine Berthelsen kommunimut qinersinermi qinigaassagaluaruni qinigaasinnaanngitsutut naliliiffigineqassasoq, Nunatta Eqqartuussisuunera Søren Søndergård Hansen aviisimi Sermitsiami taama issuarneqarpoq.
Allattoq Louise M. Kleemann
marsip 19-at 2008 06:25

- Kingullermik kommunalbestyrelsimut qinersinermi taamatut naliliivugut massakkut qinersinerup kingorna taamatut nalileeqqinnissarput ilimanartorujussuuvoq, Qinigaasinnaanermik Naliliisartut siulittaasuat Søren Søndergård Hansen taama oqarpoq.

Kingullermik kommunalbestyrelsimut qinersinermi, tassa 2005-imi Jensine Berthelsen 133-nit taaneqarpoq, partiimini Nuummi taaneqarnerpaalluni.

Qinersinerulli kinguninnguatigut, Qinigaasinnaanermik naliliisartut kommunalbestyrelsimi ilaasortaanissamut naleqqutinngitsutut naliliiffigimmanni tunuartariaqalerluni.

Tamatumunnga patsisaavoq, Sisimiut eqqartuussivianni eqqartuussineq, tassani Jensine Berthelsenip tillissimasutut ukiumi ataatsimi utaqqisitaasumik pineqaatissinneqarsimanera.

Søren Søndergård Hansenip ukiut tallimat qaangiukkaangata aatsaat ’qinigaasinnaanerup atuutileqqittarnera’ oqaatigaa.

- Immikkulli ittunik pisoqartillugu ukiut tallimat qaangiutinngitsut qinigaasinnaangortoqartarpoq. Soorlu assersuutigalugu ukiut tallimat taakkua qinersinerup kinguninnguatigut qaangiuttussaagaangata, Søren Søndergård Hansen oqarpoq.

Søren Søndergård Hansenilli qinersisoqareertinnagu Qinigaasinnaanermik Naliliisartut naliliisinnaannginnerarpai.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq