Qingalissuaq akisoqisoq mamiatsaatigineqaqaaq

Qingalissuaq pisiniarfimmi 1000 koruuningajalluinnarnik akilik, Canadap issittortaani nerisassat akii pillugit oqallinnermik pilersitsivoq. Qingalissuaq, Canadamiut dollariinik 200 dollarinik sinnerlugit akilik, Baffin Islandimi Arctic Bayimi qerititsivimmiittoq assilineqarpoq, asserlu internetsimut ikineqarmat, Canadami tamarmi mamiatsaatigineqaqaaq.
oktobarip 12-at 2009 06:11

Canadap avannaata issittortaanut nerisassanik assartuinermut 250 millionit koruunit Canadami naalakkersuisut atorsimavaat, taamaakkaluartoq nerisassat akii qaffasissorujussuupput.

Qingalissuaq akisoqisoq Nunavummi naalakkersuisup, Ron Elliotip, Nunavummi inuuniutit akisunerujussuannut ingerlaannaq assersuutigaa.

- Uuma assersuutip canadamiut eqiiallatsissinnaasuuppagit nuannissagaluarpoq, neriuppugummi takusinnaalissagaat nerisassanik ilualaartunik sassaalliinissaq qanoq ajornakusoortiginersoq, akisuallaarnerujussuat pissutigalugu, Ron Elliot Canadami TV-qarfimmut CBC-mut oqarpoq.

Qingalissuup assinga Arctic Bayimi internetsikkut kaaviiaartinneqalermat, qingalissuaq affaannarmik pisiniarfimmi akeqartinneqalerpoq.

- Qingalissuup 200 dollarinik akeqartinneqarnera ajuusaarnartumik kukkuluttornikkut pisimavoq, pisiniarfimmik piginnittoq oqarpoq. Canadamilu naalakkersuisut maanna kalerriipput inuussutissanik assartuinermut tapiutaasartut annertoqisut misissuiffigineqassasut, atuisunut iluaqutaanissaat anguniarlugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq