Qinersiviit silataanni katersuiniartut

Kalaallit Røde Korsiat Folketingimut qinersineq iluatsillugu qinersiviit silataani katersuiniarpoq. Afrikami kaattut ikiorniarlugit katersuiniartoqarpoq.
Allattoq Noah Mølgaard
septembarip 15-at 2011 11:57

Nammineq piumassutsiminnik Kalaallit Røde Korsiat sinnerlugu katersuiniartut Qaqortumi, Ilulissani, Maniitsumi Ilulissanilu qinersiviit silataanni aningaasanik katersuiniarput.

- Nalunngilarput inuppassuit qinersivinnukaasussaasut. Taamaattumik aalajangersimavugut qinersiviit silataanni katersuiniarniarluta, Kirsten Mortensen Kalaallit Røde Korsianneersoq KNRimut oqarpoq.

Maanna katersuiniarnermi ikiorniarneqarput Afrikamiut.

- Maannamut 300.000 koruuningajaat katersoreerpagut, Kirsten Mortensen aggustimiit katersuiniarnertik ingerlasoq pillugu oqarpoq.

Kalaallit suliffeqarfiutaat tunissuteqartunut ilaapput DR katersuiniarnermik aggustip 27-at aallakaatitsimmat. Nunatsinneersut arlallit Danmarkim oqarasuaatit aqqutigalugit tunissuteqartarsimapput taamatuttaarlu nunatsinni oqarasuaatit normui tunissuteqarfigineqarsinnaasut atorsimallugit.

- Katersuiniarneq una aallartimmat ilisimakannereerparput siorna Haiti-miut ikiorniarlugit katersuiniarnermi angusat nallernaviarnagit taamanikkut 1,6 millioner koruunit katersorneqarmata. Kisianni tunniussat amerlassusaat apeqqutaatinnagu pitsaasumik tusarsaatinneqartarsimavugut, Kirsten Mortensen oqarpoq.

Nuummi katersuiniarnermi peqataasut arlallit GrønlandsBankenimi sulisuupput taakku suliffimminni akuerisaapput suliffiup nalaani nammineq piumassutsimik ikiuiniarnermut suleqataanissamut.

Aamma atuaruk