Qinersisoq ataaseq 75 kr.-inik taperneqarpoq
Inatsiseqarnermut pisortaq, Søren Volder oqarpoq 2005-imi qinersinermit maanna partiit taperneqarnerusut.
Siornatigut qinersisoq ataaseq 50 koruuninik naleqartinneqartaraluartoq, maannakkut 75 koruuninik naleqartinneqarpoq.
Tapiinermi 2005-imi qinersinermi qinersisigineqartut aallaavigineqarput.
Apriilip ulluisa arfineq pingajuanni qinersinissaq siornatigut qinersisarnerniit kommunit kattussornissaat pissutigalugu pisariunerussaaq, Søren Volder oqarpoq.
Siumut kingullermik 10.548-nik qinersiseqarami qinersinissamut 791.000 koruuninik taperneqarpoq.
Inuit Ataqatigiit 5.899-nik qinersiseqaramik 442.425 koruuninik taperneqarput, Atassut 4.955-nik qinersiseqaramik 371.625 koruuninik taperneqarput. Demokraatit 3.384-nik qinersiseqaramik 253.800 koruuninik taperneqarput.
Kattusseqatigiit Partiiat qassinik taperneqassanersoq suli aalajangiunneqanngilaq, malittarisassat misissoqqissaarneqareerpata tapiissutissat amerlasusilerneqassapput, 80.000-illi 90.000-illu missaanni taperneqarnissaat ilimanarpoq, Naalakkersuisut inatsiseqarnermut pisortaqarfianniit, Søren Volder nalunaarpoq.