Qinersisinnaasut affaat ataallugit Folketingimut qinersiartortartut
Folketingimut 2019-imi qinersisoqarnerani qinersisinnaatitaasut affaat ataallugit qinersiartorput.
Qinersiartortummi 48,2 procentiinnaat qinersipput,
Tamanna Folketingimit kisitsisit takutippaat.
Folketingimut 1987-imi qinisinnaasunit 44,9 procentiinnaat qinersineraniilli aatsaat taama ikitsigeqqipput.
Qinersisut ikiliartuinnartut
Tamannali tupaallannanngilaq. Qinersisarfiimmi inoqannginneruleriartuinnavipput, Folketingimut 2007-imili qinersisoqarneranit ikiliartuinnalerput.
Folketingimut qinersinerni 2007-imit 2019-imut qinersiartortartut. Assiliartaq: KNR
Tassa nunatsinni qinersiartortut 2007-imiit maannamut 15 procentpointinik ikilipput.
Tassungalu pissutissaqarluarsinnaasoq, Ilinniarfissuarmi inuiaqatigiilerinermut ilisimatooq, Birger Poppel isumaqarpoq.
- Pingaartutut pissutaasoq tassaavoq, Namminersornerullutik Oqartussat aamma Namminersorlutik Oqartussat eqqunneqarnikuuneri, taamaattumik ulluinnarni inuunitsinnut siunissarlu ungasinnerusoq eqqarsaatigalugit aalajangiinerit annertusiartuinnartut Kalaallit Nunaanniit aalajangiiffigineqartarlernikuupput. Tamannalu soqutiginninnerup annikilliartorneranut pissutaasinnaavoq, Birger Poppel KNR-imut oqarpoq.
Amerlanerusut qinersinissaat neriuutigigaa
Nunarput Issittorlu ukiuni kingullerni ukkatarineqarnerupput. Taamaanneralu qinersiartortut amerlissutigeratarsinaagaat, ilisimatooq naliliivoq.
AAMMA ATUARUK Mød Grønlands kandidater til Folketinget
- Nunatta Issittup ukkatarineqarnerunera, sillimaniarnikkut politikkip ukkatarineqarnerunera nunattalu sunniuteqarnerusinnaanera qinersisinnaasunik peqataasoqarnerulerneranut sunniuteqarsinaassasut neriuutigineqarsinnaavoq, Birger Poppel oqarpoq.
Inuit qanoq oqarpat?
KNR-ip Ilinniarfissuarmi ilinniartut arlallit oqaloqatigai. Taakku ilaasa novembarip aallaqqaataani qinersiartornissartik naatsorsuutiginngilaat.
Malu Olsen (saamerleq) aamma Petrine Vetterlain (talerperleq). Assi: KNR
- Oqartussaaqataagama akisussaaqataallungalu qinersissuunga, Malu Olsen oqarpoq.
- Uanga qinerserusuttuaannarpunga, qinikkakka peerneqartaraluartulluunniit, Petrine Vetterlain oqarpoq.
Tara Platou (saamerleq) aamma Ria Frederiksen-Therkelsen (talerperleq). Assi: KNR
Tara Platoumut aamma Ria Frederiksen-Therkelsenimut tamanna allaaneruvoq.
- Uanga malinnaaffiginngiivikkakkit taava apeqqusernalaarpoq qinersissanerlunga, Ria Frederiksen-Therkelsen oqarpoq.
- Uanga aamma suli naluara, Tara Platou oqarpoq.
Kalaallit amerlanerusut novembarip aallaqqaataani qinersiartussanersut piffissap takutikkumaarpaa.
