Qinersisinnaassagaanni ukiut tallimat maaniissimasariaqarpoq

SIK-p Qaqortumi ataatsimeersuarnerani naalakkersuinikkut tamanna anguniarneqassasoq aalajangiunneqarpoq, Inatsisartullu taamatut isummertinniarneqassapput. Tamanna siulittaasup Jess G. Berthelsenip ima tunngavilersorpaa:

- SIK isumaqarpoq, demokratiskiunngitsoq ukiup affaannaa maani najugaqariarluni taaseqataagaani, ukiullu marluk qaangiutiinnartut aallaqqilluni, taaseqataaffigineqartullu maani nunaqavissunut atugassanngortillugit. Tamanna kikkut tamat oqartussaaneratut SIK-p nalilinngilaa. Taamaattumik isumaqarpugut ukiuni tallimani najugaqareernikkut taaseqataasinnaalissagaanni pissusissamisoortoq.

Ullumikkut qinersisinnaassagaanni ukiup affaani najugaqarsimanissaq piumasaqaataavoq. Sooruna taamarsuaq sivitsuiniartusi?

- Nunarujussuarput isorartoorujussuuvoq, paasisimasaqarfigillualissagaannilu ukiup affaannaa najorsimanissaa naammanngilaq, aappaatullu taaseqataaffigisat kingunissaat aamma maani inooqataaffigineqartariaqarput.

Kalaallit nunaminni ikinnerussuteqalersinnaanerat SIK-mit ernummatigineqarpa?

- Alcoa assersuutigiinnarutsigu, naatsorsuutigineqarpoq, sulisut 3.000-it missaat tikissasut. Taamaattumik taasisarnerup sukaterneqarnissaa pisariaqarpoq.

Kalaallit Danmarkimiittut aamma ukiup affaa najugaqareeraangamik qinersisinnaatitaalertarput. Tamanna aamma pissusissamisuunngitsutut isigaajuk?

- Uagut ukiut tallimat maaneereersimanissamik piumasaqassagutta, taava aamma Danmarkimi naalakkersuisut aamma ukiunik tallimanik piumasaqassappata tupigusuutissaannavianngilaq, Jess G. Berthelsen oqarpoq.