Qinersinissamut oqallisaarut piareerpoq: Kim Kielsen qinersinissamik aqagu suaaruteqarsinnaavoq

Illuatungiliuttut qinersisoqarnissaanik kissaateqarput – kissaallu taanna Inatsisartut ukiukkut ataatsimiinneq aqagu aallartippat aalajangiiffigissavaat.
Apeqqut tamanna Naalakkersuisut tunuliaqutaat Inatsisartuni 31-usuni aqqaniliinnanngorlutik sapaatit akunnerata siuliani ikinnerussuteqalereersullu soqutiginarsivoq. Assi © : KNR / Malik Brøns
Allattoq Christine Hyldal
februaarip 15-at 2021 16:22

Kim Kielsen Inatsisartunut qinersisoqarnissaanik aqagu suaaruteqartuusinnaavoq.

Inatsisartummi allattoqarfiata partiit sisamat siunnersuutaat akuerineqartoq paasissutissiissutigaa.

Suliap naatsumik oqaluttuarinera


Demokraatit naalakkersuisoqatigiinnit ataasinngormat tunuarmata Kim Kielsenip naalakkersuisoqatigiivi ikinnerussuteqalerput.

 

Naalakkersuisoqatigiit Siumut Nunatta Qitornaalu Inatsisartuni ilaasortaaffinni 31-usuni aqqanilinnik ilaasortaatitaqarput.

 

Siumup siulittaasortaava Erik Jensen Kim Kielsen taarserlugu Naalakkersuisunut siulittaasunngorusuppoq.

 

Partiilli illuatungiliuttut Siumup siulittaasortaavata naalakkersuisoqatigiivinut ilaarusunngillat.

 

Inatsisartuni amerlanerussuteqartut qinersititsinissamik maannakkut kissaateqarput.

 

Naalakkersuisut siulittaasuat nammineerluni tunuanngippat, qinersinissap sulissutigineqarnissaa partiit namminneerlutik aallartissinnaavaat. 

 

Partii Naalakkersuisunut Naalakkersuisulluunniit siulittaasuannut tatiginnikkunnaarnermik ukiukkut ataatsimiinnermi taasititsippat qinersinissamut alloriartoqarsinnaavoq.

 

Naalakkersuisut siulittaasuat tunuarpat, Inatsisartut siulittaasumik nutaamik qinersissapput.

 

Siulittaasoq nutaaq naalakkersuisoqatigiinnit Inatsisartuni amerlanerussuteqartunit tapersersorneqartunik pilersitsissaaq.

 

Ukiukkut ataatsimiinneq marlunngorpat marsip ulluisa aappaanni aallartissaaq.

 

Tusarfiit: KNR taavalut Inatsisartut Allattoqarfiat 

Illuatungiliuttunit Inuit Ataqatigiit, Demokraatit, Partii Naleraq Atassullu ataatsimoorlutik Inatsisartunut qinersisoqarnissaanik suaaruteqartoqarnissaa kaammattuutigalugu tusagassiuutinut nalunaarummi naatsumi paasissutissiissutigaat.

AAMMA ATUARUK Siunnersuut takkuteqaaq: Partiit sisamat qinersisitseqqusipput

Aqagulu Inatsisartut ukiukkut ataatsimiinnerat nalunaaqutaq aqqanermut aallartippat tamaaliortoqarnissaa partiit sisamat kissaatigaat.

Partiit taakku sisamat Inatsisartuni qinigaaffinnit 31-nit 19-nik qinigaatitaqarput – taamaalillutik naalakkersuisoqatigiinnut Suleqatigiissitsisunullu aqqaneq-marlunnik qinigaatitaqartunut amerlanerussuteqarlutik.

Apeqqut tamanna Naalakkersuisut tunuliaqutaat Inatsisartuni 31-usuni aqqaniliinnanngorlutik sapaatit akunnerata siuliani ikinnerussuteqalereersullu soqutiginarsivoq.

Demokraatimmi naalakkersuisoqataajunnaarlutik ataasinngormat nalunaarput.

Tamatuma kingunerisaanik Siumut nutaanik amerlanerussuteqarniarsarivoq, iluatsinngilarli.

Tamatuma saniatigut partiit illuatungiliuttut qinersinissaq kajumissaarutigaat, arlaannaalluunniilli ullumi ulloq nallertinnagu iliuuseqarani.

- Pisut partiillu Inatsisartuni amerlanerussuteqarluartut qinersinissamik kissaateqarlutik naqissuseereernerisa kingunerisaanik oqaluuserisassamik qinnuteqaateqarpugut, Inuit Ataqatigiit, Demokraatit, Partii Naleraq Atassullu tusagassiuutinut nalunaarummi allapput.

Naalakkersuisunut tatiginnikkunnaarnermik taasisitsisoqassappat tamatuminnga pinngitsoortitserusulluni, Siumut ippassaq sapaammi unnukkut nalunaarpoq. 

Partiilli sisamat illuatungiliuttut siunnersuuteqarlutillu qinersititseqqusisuusut Inatsisartuni amerlanerussuteqarput.

  • Taamaammat siulittaasoqarfiup qinersisoqarnissaanik siunnersuut akuerissavaa
  • Ataatsimiinnermut siunnersuuteqartoqarnissaanut sapaatit akunneri tallimat periarfissaapput
  • Taamaammat siunnersuutip oqaluuserisassaniilernissaanut Inatsisartuni siulittaasoqarfiup piffissaliussaasumit immikkut akuersissuteqarnissaanik tamanna isumaqarpoq

Paasissutissarsiffik: Inatsisartut Allattoqarfiat