Qinersinermi inernerit unnuap qeqqata kingorna naammassissagunarput

Inatsisartunut qinersineq unnugu naammassippat qinersinermi inernerit siullerpaamik qarasaasiat atorlugit katersorneqassapput. Periuseq taanna nutaajuvoq, tassami siornatigut qinersinermi inernerit fax atorlugu qinersinermi ataatsimiititaliamut nassiussuunneqartarmata.
Allattoq Jaaku Lyberth
juunip 02-at 2009 12:25

Qinersinermit inernerit kisinneqareerlutik sukkanerusumik katersorneqarsinnaanissaat qinersinermi ataatsimiititaliap allattoqarfianit oqaatigineqarsinnaanngilaq, qinersivinni ataasiakkaani kisitsinerit qanoq sukkatiginerat apeqqutaammat.

- Illoqarfikkaartumik qinersinermit inernerit qinersinermi ataatsimiititaliamut naalakkersuisullu siulittaasuta naalakkersuisoqarfianut nassiunneqassapput, tassanngaanniillu avammut nalunaarutigineqarlutik, taamatut oqarpoq, qinersinermi ataatsimiititaliap allattoqarfiani siunnersorti Peter Søren Olsen.

Nalunaaqutaq unnuap qeqqata missaani qaangilaarluguluunnit nuna tamakkerlugit inatsisartunut qinersinermit kisitsisit inerneri saqqummiunneqarsinnaanissaat Peter Søren Olsenip naatsorsuutigaa.

Qarasaasiaq atorlugu qinersinermi inernernik katersineq KIMIK A/S-ip Tele Greenlandillu suleqatigiinnerisigut piviusunngopoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq