Qinersineq akueriumanngilaat
Zimbabwemi præsidentissarsiorluni aappassaanik ullumi qinersisoqarnera EU-kommissionimit peqquserlunnertut asuliinnaliornertullu taaneqarpoq – aamma qinersineq qinersinerullu inernera kommissionip akuersissutiginavianngikkaa, nutaarsiassaqartitsivimmi Reutersimi allaaserineqarpoq.
Allattoq Elisa Isaksen
juunip 27-at 2008 14:02
- Naalagaaffiit Peqatigiit assigalugit – qinersineq inatsisinik maleruagassanillu malinniffiunngitsutut - EU-kommissionip nalilerpaa, EU-mit oqaaseqartitaq oqarpoq.
Amerikamiut nunanut allanut ministeriat oqarpoq, USA-p Naalagaaffiit Peqatigiit Sillimaniarnermut siunnersuisoqatigiivi attaveqarfiginiarai, tassa Naalagaaffiit Peqatigiit Robert Mugabemut qanoq iliuuseqarnissaat oqaloqatigiissutigineqarniassammat.
Nutaarsiassaqartitsivik AFP nalunaarpoq, præsidentip illoqarfiit pingaarnersaanni Hararemi politiit inuinnartut atisalersorsimasut, qinersiartorusunngitsunik pingitsaaliilluni qinersiartortitsisussatut peqqusimagai.
