Qinersineq aallartiinnaqaaq
Inatsisartuni inissat 31-usut, qinigassanngortittunit 222-nit, partiinit arfinilinneersunit kisimiillutillu qinigassanngortittunillu ataasiakkaanit arlalinnit pilerngunneqarput.
Qinersisartut unnugu nalunaaqutaq arfineq-pingasut tungaannut qinersinissaminnut periarfissaqarput.
Unnugu kingusinnerusukkut qinersinerup inerneri internetikkut malinnaaffigineqarsinnaassapput, uunga iserluni www.qinersineq.gl tassani qinersivinnit ataasiakkaanit inernerit naammassigaangata takuneqarsinnaalertassammata.
Aamma KNR-ip nittartagaani www.knr.gl- imi qinersinerit inerneri malinnaaffigineqarsinnaassapput, soorluttaaq tekst-tv-mi qupperneq 800-mi aamma malinnaaffigineqarsinnaassasut.
Qinersinerup nuna tamakkerlugu inernera siusinnerpaamik unnuap qeqqata missaani piareersimassangatinneqarpoq, tamakkulu annerusumik paasisaqarfigisinnaavasi, qinersineq pillugu KNR-ikkut nalunaaqutaq qulingiluaniit aallakaatitsisoqalerpat.