#IQ2018 Qinersiartortut ataatsimut isigalugit ukioq manna ikinnerupput

Kommuneqarfik Sermersuumi taasinerit nalunaaqutaq pingasunut tamakkiisumik procentitaat illoqarfinnut Nuummut, Paamiunut, Tasiilamut Ittoqqortoormiinullu tunngasut takutippaat illoqarfinni taakkunani qinersisinnaatitaasut 34,5 procentii qinersiartorsimasut. Katillugit 5368-it qinersiartorsimallutik.

Ittoqqortoormiit akunnernik marlunnik siuaqqapput, tamaanilu qinersiartorsimasut tupinnanngitsumik amerlanerupput, qinersisinnaatitaasut 47 procentii qinersiartorsimallutik.

Nuummi qinersivimmi qinersiartortut Nuummi Illorsuarmi Timersortarfimmi qinersiartortarput, nalunaaqutaq pingasunut qinersiartorsimasut 33,3 procentiullutik.

Paamiuni piffissap taamaalinerani, tassa nalunaaqutaq pingasunut qinersiartortut 41,8 procentiupput, Tasiilami 37 procentiulluni. Kommuneqarfik Sermersuup nittartagaani tamanna atuarneqarsinnaavoq.

Ittoqqortoormiini 2014-imi piffissap taamaalineranut sanilliullugu amerlanerit taasiartorsimasut eqqaassanngikkaanni, Kommuneqarfik Sermersuumi kisitsisit nalunaaqutaq pingasunut saqqummiunneqartut takutippaat qinersiartortut 2014-imut naleqqiullugu ullumi ikinnerulaartut.

Paamiuni Nuummilu ukioq manna nalunaaqutaq pingasunut qinersiartorsimasut, 2014-imut naleqqiullugu ikinnerungaatsiarput, Nuummi ukioq manna qinersiartortut 2014-imut naleqqiullugu 6 procentpointinik ikinnerullutik, Paamiuni 11 procentpointinik ikinnerullutik.

Tasiilami piffissap taamaalinerani qinersiartorsimasut 2014-imut naleqqiullugu allannguuteqarpallaanngillat.

Ukioq manna qinersiartortut 2014-imut naleqqiullugu ataatsimut isigalugu ikinnerusut, Juaannannguaq Jensenip, Sisimiuni qinersinermi aqutsisup oqaatigaa.
Nalunaaqutaq pingasunut qinersiartorsimasut 34,8 procentiupput, 2014-imi 41,2 procentiulluni, tassa 6 procentpointit missaannik ikinnerullutik.