Qineqqusaarnissaq akissaqartinneqanngilaq
Ikaarsaarnermut ataatsimiisitalianut apriilip arfineq pingajuani qinersinissamut atatillugu Kommuneqarfik Upernavimmi nunaqarfiit qulingiluat qineqqusartunit tamakkerneqarnissat qularutigineqaqaaq.
Siku aakkartitilermat qimussimik angalanissaq ajornarsivoq, Air Greenland-illu qulimiguulimmik attartortitsinermut akigititaannut partiit immikkoortoqarfiisa aningaasivii inorsarujussuarput.
Upernavimmiit Aappilattumut sikukkut qimussimik
aqqutaa ajortikkiartorpoq, taamaalillunilu illoqarfimmiik nunaqarfinnut avannarpasissuniittunut sikukkut angalasniarneq nalorninarsivoq.
Taava qinequsaartut qulimiguulimmik angalanissaat piviusorsiorneruvoq. Kisianni Attartorluni 300 kilometerisut avannarpasitsigisumut Kullorsualiarniaraanni qulimiguullip timminerinnaa nalunaaquttap akunneranut 23.600 koruuneqarpoq, saniatigullu qulimiguullip utaqqinera, aallarnermi akiliut allallu akilerneqarussaallutik.
Taamaammat partiit Upernavimmi immikkoortoqarfii ajornartorsiorput.
Siumup Upernavimmi qinequsaartunut ataqatigiisaarisua Gaba Petersen oqarpoq angallannikkut akit taama qaffasitsigitillugit qineqqusaarluni sumiiffimmiit sumiiffimmut angalaqattaarnissaq akissaqartinneqanngitsoq naak kissaatigigaluaritsik innuttaasut tamarmik qineqqusaarfigineqarnissaat.
Gaba Petersen aamma oqarpoq Upernavimmi Siumukkormiup ataatsip Ilulissanut qineqqusaariarnissaa neqeroorutigineqartoq aamma naaggaassagunaritsik, Siumut Upernavik akissaqanngimmat.
