Qineqqusaarneq qinersisartut soqutiginngilaat
Qallunaatut qineqqusaarnissaagaluaq Nuummi ualimut marlunut aallartittussaagaluarpoq, nalunaaquttalli akunnerata affaa qaangiummat qinersisartunillu tusarnaariartoqanngimmat, qineqqusaartussaagaluit angerlaannarput.
Tamanna Inuit Ataqatigiit sinnerlugit qinigassanngortittup Esmar Bergstrømip oqaluttuaraa.
- Partiini suleqataasut qineqqusaartullu aappaat nuliaallu kisimik takkupput, tassa qinersisartunik takkuttoqanngilaq, Esmar Bergstrøm oqarpoq.
Danskisut oqaluttut qinersinissamut soqutiginninnerata taama annikitsiginera taassuma tupigusuutigaa.
- Qallunaatut oqaluttut ulluinnarni oqallinnermut akuliunnissartik tunuarsimaarfigineq ajoraluarpaat, kisianni qineqqusaarnermi qanoq oqariartuuteqarniarnerput soqutigisimanngilaat, Esmar Bergstrøm oqarpoq.
Qaqortumi unnugu qineqqusaartoqassaaq, kalaallisut arfineq pingasunut aallartissaaq qallunaatullu 22.45 aallartissalluni. Qineqqusaarnerit radiukkut tv-kkullu toqqaannartumik aallakaatinneqartussaagaluarput, silalli ajornera pissutigalugu teknikerit apuussinnaajunaarmata radiukkut tv-kkullu toqqaannartumik aallakaatitsisoqassanngilaq.
