Qineqqusaarneq Danmarkimi aallarnerpaat

Nunarput sinnerlugu Folketingimi ilaasortanik nutaanik marlunnik qinersisoqassaaq.IA-meersoq Juliane Henningsen aamma Siumumeersoq Lars Emil Johansen tamarmik nalunaareerput qinigassanngorteqqinniaratik.

Maannamuugallartoq Siumut kisiartaalluni qinigassanngortitaminik aammalu qineqqusaarnissami pingaartitassanik saqqummiussivoq.

Siumut Folketingimi qinigaaffimmi suliniutinik nutaanik pingaartitai makkuupput:

1. Naalagaaffeqatigiinnerup iluani issittoq pillugu ersarissumik politikkeqarnissaq.

2. Akisussaaffiit Naalagaaffiup ingerlataasa nunatsinnut atoruminartuunissaannik qulakkeerinneqataaneq.

3. Naalagaaffeqatigiinneq illuatungeriinnit ataqqinartumik ammasumillu ingerlanneqarnissaannik qulakkeerinneqataaneq.

4. Nunatta inuisa, avatangiisiata soqutigisaasalu illersorneqarnerat annertusassaaq.

Siumulli qinigassanngortitassai tassaapput arnat marluk angutillu marluk:

Arnartai tassaapput Akitsinnguaq Olsen, Nuuk, Nutserisoq, inatsisartuni ilaasortaq aamma Doris Jakobsen, Nuuk, Kommuneqarfik Sermersuumi kommunalbestyrelsemi ilaasortaq, Inatsisartuni ilaasortaq.

Angutitai tassaallutik Nick Nielsen, Ilulissat, Cand.polyt, Qaasuitsup Kommuniani Pisortaq, Sanaartugassanut Avatangiisinullu Ingerlatsivimmi.

Aamma Vittus Qujaukitsoq, Nuuk, Siumut Nuummi siulittaasoq, Nutserisoq, oqalutseq aammalu aatsitassarsiornermut siunnersorti.

Qinigassanngortittut Christiansborgiliarlutik ullumi aallarput Siumut partiitut suleqatai Socialdemokratit Folketingimut qinigassanngortitai peqatigalugit ataatsimiigiarlutik piareersariartorlutillu.

Namminersornerup eqqunneqarnerata kingorna Folketingimut qinersineq siulleq maanna pisussaq suli ullulerneqannilaq.