Qimuttunik toqoraasimaneq misissuiffigileruttorpaat
Isumalioqatigiissitaq ukiup ataatsip matuma siornagut pilersinneqarpoq, ukiorpassuarni oqaatigineqartartoq, tassa naggueqatigiit Inuit inooriaasitoqqaminnik qimatsinissaat siunertarlugu, 1950-ikkunni 60-ikkunnilu Canadamiut politiivi qimuttunik toqoraasarsimasut, misissuiffigineqarsinnaaniassammat.
Isumalioqatigiissitap maanna naggueqatigiit Inuit nunaqarfii qulit tikeraarsimalerpai, oktobarilu qiteqqutsinnagu tusarniaanerit kingulliit pingasut ingerlanniarneqartut, Nunatsiaq News nalunaarpoq.
Isumalioqatigiissitaq maannangaaq Canadami naggueqatigiit Inuit pillugit paasissutissanik amerlaqisunik katersereersimalerpoq, paasissutissarpassuit qimuttunik toqoraasimanerup misissuiffigineqarnissaanik suliassamut attuumassuteqanngikkaluartut. Soorlu naggueqatigiinni Inunneersut oqaloqatigisimavaat, nassuiaanneqaratik imaluunniit ilaquttaminnik takusaqarsinnaatinnagit umiarsuarmut sakialluummik misissuummut ikiteriarlugit Canadap kujataaliaanneqartarsimasut. Ilaqutaasut ilaat taamatut aallarunneqarnerminni toqusarsimapput, timaallu utertinneqassanatik. Taama oqaluttuarpoq isumalioqatigiissitami pisortaasoq Madeleine Redfern.
Eqqaamasalli annernartuinnaanngitsut taassuma aamma oqaatigaa. Ilaasa illutaarsuatik angisuut, eqqiluitsut kusanaqisullu eqqaamavaat. Aamma allat Canadamiut naggueqatigiinnut Inunnut nakorsaatitigut ikiuunnerat nuannaarutigalugu eqqaamavaat. “Ilumoortussaq pillugu isumalioqatigiissitat” suliartik 2009-mi septebarimi naammassissallugu naatsorsuutigaat.
