Qimuttunik qimmiutillit tusarniaavigineqalerput

Qimmit ilumut ullut tamaasa imertillugillu nerisinneqartassappat, aamma qimmiutillit qimuttussatut qimmiminnik sungiusaanerminni annersitsinngilluinnassappat? Apeqqutit taakku allarpassuillu akissutissarsiniarlugit Kalaallit Nunaanni Qimussertartut Kattuffiata (KNQK) qimuttunik qimmeqarfiit tamaasa tusarniaaffigilerpai.
aggustip 17-at 2007 06:14

Nunatsinni qimmeqarnermut qitsuuteqarnermullu inatsit ullumikkut atuuttoq, Qimussertartut Kattuffiata qimuttunik qimmeqarfiusumi naleqquttutut isiginngilaa.

- Qimuttut aasaanerani soorunami imertinnissaat pingaartuuvoq, ullulli tamaasa nerisittariaqanngilaq, qimuttannginnerminimi peqqinnanngitsumik puallaannaqinaaq, Mikkel Jensen Saqqami kattuffimmit tusarniaasitaq oqarpoq.

Qimuttoqarfiusuni qimmillit tamaasa tusarniarfigerusuppaat, qitsuuteqarnermut qimmeqarnermullu inatsit pissutsinut atuuttunut naleqqutinngitsutut isigigamikku.

- Issittup qimmianut qimuttuusumullu inatsisip naleqqunnerusunngornissaanut allannguutissanik naalakkersuisunut tunniusserusukkatta, Mikkel Jensen oqarpoq.

Illoqarfinni nunaqarfinnilu qimmeqarfiusumi peqatigiiffeqarpat peqatigiiffiit periarfissinneqarput kingusinnerpaamik septembarip ulluisa 30-anni allakkatigut qimussertartut kattuffianut nasiussaqarnissaminnut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq