Qimuttuitsut asbestimik ulikkaartut

Danmarkimi sap. akunnerani qaangiuttumi DSB-p qimuttuitsuutai pisoqqat S-togit asbestimik kræfteqalissutaasinnaasunik ulikkaartut sammineqarput.

Maannalu danskit aalisartui aammattaaq mianersoqqusipput.

Jette Andersen paasissutissiivoq:

DSB-p sulisuisa S-togini asbestinik qanimut suliaqartarsimasut peqqinnissamikkut navianartorsiortinneqarsinnaanerat annilaanngatigaat.

Maannalu asbesteqarneranik annilaanganeq aammattaaq danskit aalisartuinut siaruaappoq.

Taamatut ullumi allappoq Ringkøbing Amts Dagblad.

- Asbestinik suliaqartarneq DBS-mi sulisunut navianaateqarsimaguni aamma uatsinnut aalisartunut navianaateqassaaq. Aalisartoqaterpassuakka 50-it 60-illu akornanni ukiullit kræfteqarneq pissutigalugu annaasimavakka, annilaanngatigaaralu aalisariutitsinni asbestinik pujoralaqartuni ukiorpassuarni sulisarsimagatta, aalisariutip naalagarisimasaa P.C. Mikkelsen Thorsminde-meersoq oqarpoq.

Asbesti igaffimmi maskiinaqarfimmilu atorneqartarpoq.

- Siatsivik asbestinit nerisassanut nakkaalasunit 10 centimeterinik ungasissuteqartarpoq, aalisakkanik siatsillutalu naatsiianik uutsigaangatta. Arlaleriarujussuarlungalu motorip timitaani asbestip pujoralaani atera allattarpara, P.C. Mikkelsen oqaluttuarpoq.

Radioaviisip ullo’qeqqata siorna maani nunatsinni tamatumunnga tunngasumik oqaaseqaatinik pissarsiniaraluarpugut.

Kalaallimmi aalisariutaat amerlaqisut siornatigut Danmarkimi angalaartarsimapput.

Sullivinnilli Nakkutilliisoqarfinneersoq Arnaq Grønvold Søfartsstyrelsemiillu Hans Fleischer kalaallit aalisariutaanni asbestit navianartorsiutaasinnaanerannik ilisimasaqanngillat. KNAPK-miit John Biilman oqarpoq paasissutissat imminerminut nutaajusut.