Qimussit aqqutaat suli aqqutigineqarsinnaanngillat
Ilulissat eqqaanni Akinnaap tungaanut qimusseqqusinnginnissamik kaammattuineq suli atuutsinneqartoq, Qaasuitsup kommuneanit nalunaarutigineqarpoq.
Allattoq Apollo Jeremiassen
Kommunimit periarfissaqanngillat apummik nussuinissaminnut, aputeqanngimmat. Aamma siorarterisinnaanngillat anorip tingittarmagit, ikuttaasinnaanatik nuna isorartuallaaqimmat, kiisalu tarajorterisinnaanatik qimussit aqqutaat imeqarfiup eqqaaniimmat.
Kommune qimusseqqusinngikkallarnermik kaammattuuteqareeraluartoq qimussertoqassappat tamanna inuit ataasiakkaat namminneq akisussaaffigissagaat, kommune erseqqissaavoq.
Qimussit aqqutaasa atorneqarnissaat ernumanartueruppat, tamatuminnga kommune nalunaaruteqassalluni allappoq.