Qimussimik sukkanniuttut pujortaqqusaanngillat

Maleruagassanik sukaterineq Ilulissani peqatigiiffimmi Qimussersami kingullermik ataatsimeersuartoqarnerani aalajangerneqartoq, siulittaasoq Villi Siegstad oqarpoq.

- Sukkanniuttut akornanni pujortarneq unamminermut akornutaasartoq naluneqanngilaq, tassami qimmit tupap pujuanik naamatillutik tamaviaarunnaartarput, angujartuaangartillu pujortaraangat tunuarsimaaginnalersarlutik, Ville Siegstad oqarpoq.

Taamattumik ilaasortat piumasaat naapertorlugu unamminerup nalaani pujortartoqartarunnaarnissaa alaajangerneqartoq, Ville Siegstadip oqaatigaa.

Isiginnaartartut aamma pujortartarput, taakkumi?

- Naamik sukkanniunnermi peqataasut kisimik uani pineqarput.

Unamminermi periutsit aamma sukateriffigineqartut Ville Siegstadip oqaatigaa.

- Sukkanniunnermi angutikkaanni iperartorluni saneqquttaaliortarneq aamma akuerisaajunnaarpoq, qimmit uloriasutsinneqartarmata, Ville Segstad oqarpoq.

Ilulissaninngaanniit annguttussat katillugit arfineq-pingasut Avannaata Qimussersuanut Sisimiuni marsip 26-ani pisussami peqataassapput.