Qimussimik sukkaniunnerit nunarsuarmi isorartunersaanni ajugaaqqittoq

Yukon Questimik taallugu Canadami qaammatip siuliani sukkaniuttoqarpoq, Amerikap nunavittaani qimusserluni sukkaniunnerni taanna isorartunerpaalluni.

Sukkaniunnerilli ilisimaneqarpaat tassaagunarpoq Iditarod, Alaskami pisussatut aaqqissuunneqartartoq. Iditarod Fairbanksimit Nomemut ukioq manna ingerlavoq, 1600 kilometerit sinnilaarlugit ingerlaartoqassalluni.

Iditarodimi ukioq manna ajugaasoq tassaavoq Mitch Seavey, Iditarodimi pingajussaa ajugaasoq. Mitch Seaveyp ernera Dallas Seavey tulliulluni apuuppoq.

Mitch Seavey 1600 kilometerit missaanni ingerlaarami atorpai ullut arfineq-pingasut, akunnerit pingasut minutsillu 40-t. Aatsaat taama sukkatigisoqartigaaq, agguaqatigiissillugillu 30 gradinik issitsigisumi ingerlaartoqarluni.

AAMMA ATUARUK Canadami qimussertartut piviusulersaarut nutaaq kamaatigigaat

Qimmini ukiup tamaat paarilluarlugillu sungiusartaramigit ajugaalluni, Mitch Seaveyp oqaatigaa.

Taassuma saniatigut aamma oqaatigaa qimmit ataasiakkaat qimussini inissaqartillugit, qimmeq qasulluinnalersimappat ingerlaarnerup nalaani qimussini qasuersaartittarlugit.

Mitch Seavey aamma tassaavoq Iditarodimi ajugaasut maannamut utoqqaanersaat:

- 57-inik ukioqarpunga, utoqqarsuartullu imminut isigisussaagaluarlunga, pissutsilli allanngornikuupput, utoqqarsuartullu imminut isiginanga, Mitch Seavey oqarpoq.

Mitch Seaveyllu Iditarodimi ajugaanini tulluusimaarutigalugulu soorunami aamma nuannaarutigisinnaavaa, ajugaanerminummi atatillugu akissarsiassai tassaapput aningaasat millionit affaasa missaat lastbiilillu.