Qimussimik sukkaniunneq Ivakkak naammassivoq
Qimusserluni Nunavimmi sukkaniunnerit ilaat anneq Ivakkammik taaguuteqartoq naammassineqarpoq.
Qimusserluni sukkaniunneq Ivakkak marsip ulluisa 28-anni aallartippoq, siullerlu ullut 18-it ingerlaareerluni arfininngornermi apuulluni.
Qimussertut Hudsonip kangerliumanersuata sineriaa atuarlugu nunaqarfik Ivujivik tikillugu ingerlaarput.
Ingerlaarfik 650 kilometerinik isorartussuseqarpoq, sumiiffiillu amerlanersaanni silarluttaqattaarmat aqqutaa ilungersunarsimaqaaq, qimussertullu nunaqarfinnut pigaangata sivisunermik uninngaqqaartarsimapput.
Qimussertut uninnganeranni nunaqarfiit nerisitsillutillu aliikkusersuipput.
Puernittormiut Aisa Surusilak aamma Aipilie Qumaluk akunnerit 60-it ingerlaareerlutik pissartanngorput.
Pissartanngortut tulluusimaaqisut nalliuttorsiutigineqarmata kuultinik ujaminnapput.
