Qimmit Upernaviup nunaqarfiini nappaalallutik toqorarput
Nutaarmiuni, Tasiusami, Naajaani aamma Innaarsunni qimminik nakkutilliisut qimmit akornanni nappaalasoqarneranik toqorartoqarneranillu nalunaarput. Qimmit nissumikkut noqartaleriarlutik toqusarsimapput. Qimmit nutaqqat suli akiuussutissamik kapitissimanngitsut eqqugaasut Namminersorlutik Oqartussanit oqaatigineqarpoq.
Nersutinut inuussutissanullu immikkoortortap ilimagaa nappaat pineqartoq tassaassasoq qimmit nappaataat tuniluuttorujussuaq atugaalersimasoq.
Qimmit nutaqqat suli akiuussutissamik kapitissimanngitsut nappaammit eqqungaapput, taamaattumik qimmit akiuussutissalerlugit kapitittarnissaat pingaartorujussuusoq nersutinut inuussutissanullu immikkoortortap erseqqissaatigaa.
Kapuut akeqanngilaq nunaqarfiullu allaffianut imaluunniit qimminik nakkutilliisumut saaffiginnilluni pineqarsinnaalluni.
Qimmit peqqissut kisimik akiuussuserneqarsinnaapput.
Nersutinut inuussutissanullu immikkoortortap kajumissaarutaa naapertorlugu qimmit napparsimasut ilaminnit immikkoortinneqassapput. Qimmit napparsimavallaat qimminik nakkutilliisumut toqutsinneqassapput, kiisalu qimmit toqungasut qimmeqatiminnik suli tunillaasinnaammata ikuallanneqarnissaat imaluunniit peerneqarnissaat uumasut nakorsaannit inassutigineqarpoq.
