Qimmit qimuttut aasaanerani paarilluarneqarnerulerput. Siorna toquinnarneqartariaqarsimasut 60-usut ukiormanna marluinnaat siumorsimagini,
Uumasut nakorsaat Elisabeth Mærsk Møller, Upernavimmi eqqaanilu angalaqqammersoq oqaluttuarpoq.
- Avannaani qimminik qimuttoqarfinni angalaaqqammerpunga, qimmit inuussutissalerinermillu suliaqarfiit allallu uumasut nakorsaattut suliassatta ilaat alakkarterlugit, Elisabeth Mærsk Møller oqaluttuarluni aallartippoq.
Uumasut nakorsaata qimmeqarfinni siorna angalanermini qimmit paarinerlutat 60-it toquinnartariaqarsimavai, qanittukkullu juunip ulluisa 25-anniit juulip ulluisa arfineq-aappaata tungaanut angalanermini marluinnaat toquttariaqarsimallugit.
- Qimmit takusagut isikkorinnerulersimaqaat, nukeqarluarput sanigorsimarpasinnatillu. Qimmit marluk sanigorpallaarujussuarsimasut annassinnaanngitsutut nalilikkakka toquttariaqarsimavakka. Taakku Upernaviup nunaqarfiisa ilaanni marlunni siumorpakka, nangipporlu.
- Paarinerlutat ikilerujussuarsimanerannut peqqutaasinnaavoq, misissuinitta siornarnit siusinnerusukkut pinera, aamma imaassinnaavoq qimuttunik paarsilluarnissamik ilitsersuinigut kinguneqalersimasut, uumasut nakorsaat oqarpoq.
Ilisimaneqarpoq qimmit qimuttut amerlanerit ukiuunerani paarilluarneqartarnerat, aasakkullu akuttunerusumik alakkarneqartarnerat.
Sapaatip-akunnerini marlunni angalanermini qimmit peqqissutut pissusilersornersut, imissaqarluarnersut nerukkarneqartarsimanersullu misissorpai.
Siorna ukiakkut oktobarimi misissuinermi qimmit 60-it toquinnartariaqarsimapput ima nukeerutsigisimammata sanigortigisimallutillu, allaat saarni najungasuilu ersiinnalersimallutik.
- Angalaninni qimmiutillit oqaloqatigilluarpakka siunnersortarlugillu. Uumasut nakorsaqarfianit nakkutilliinigut nangillugit ukiormanna angalaqqittarumaarpugut. Politiit angalatilluta aamma suleqatigilluartarpagut, nangeqqipporlu.
- Aasaanerani qimmit imissaqarluartinnissaat pingaarnerpaavoq, soorlu maannakkutut seqinnertualersillugu ullut tamarluinnaasa imermik tunisariaqarput qilalertinnaveersaarniarlugit. Qilallutimmi ullup unnuallu ingerlanerinnaani nukillaarlutik uppissinnaapput toqullutillu, Elisabeth Mærsk Møller oqarpoq.
Nalunerarpaali qimminik sumiginnaaneq unitsivinneqarsinnaanersoq.
-Ileqqupalaat oqallisigiuarnerisigut aatsaat pissutsinik allanngortitsisoqarsinnaavoq, taamaattumik paasisitsiniaajuassaagut, uumasut nakorsaat nassuiaavoq.
Uumasut nakorsaat Elisabeth Mærsk Møller aamma oqarpoq maanna TV-mi takoqqusaarusiat atorlugit qimminik paarsilluarnermut tunngasunik suliaqartitsillutik aasap ingerlanerani takutinneqartussanik. Aamma kommunit qimuttoqarfiit ikiorsiullugit qimmiutillit saaffigineqarput, qanoq qimmit qimuttut aasaanerani paarilluarneqarsinnaaneranik imalimmik.
