Qimmit pitutat aallaaneqarput

Ilulissani qimmiutilik, Johan Villadsen ukioq manna avaanngunartumik misigisaqaqqippoq. Ukioq qimusserfinngormalli pingajussaa qimmimi arlaat aallaammik aallaaneqarluni toqutaasimasoq siumorpaa martsip ulluisa 13-ani. Siulleq januaarimi tullialu februaarimi unnuakkut aallaaneqarlutik toqutaapput. Johan Villadsenip qimmii tamarmik malittarisassat naapertorlugit pitoqqapput. Johan Villadsenip qimmini inuutissarsiutimisut ukiukkut atortarpai upernaakkullu sukkanniutitut.

Johan Villadsen Ilulissat aviisianut ”Iluliarmiumut” oqarpoq qimmimi pitsaanersaat pingasut taamaasilluni annaagini tamatigullu unnuami qimmini aallaaneqartarsimasut aammalu taama pisoqartartoq aalisartut sukkanniunnissaannut piareersarfik ingerlallualeraangat.

Johan Villadsen aalisartut siorna sukkanniummata normu 3-iuvoq. Ukiut siuliini arlaleriarluni aamma Avannaata qimussersuanut peqataasarpoq.

Ilulissani politiit oqarput suli paasiaqarsimanatik misissuinertilli suli ingerlakkitsik.

Johan Villadsen piniariarluni angalammat oqaaseqartissinnaasimanngilarput.