Nunatsinni amaroqanngilaq, tumit allanartut Maniitsup eqqaani aavartunit siumorneqarput, taakku qimmit tumaanut assingusimapput anneruinnarlutilli.
- Amaqqup tumiginngilai, qimmimuna nujuartap tumai, taama qulanngivilluni oqarpoq Pinngortitalerivimmeersoq ilisimatooq Christine Cuyler.
- Amaqqup tumigisimasuugaluarpagit taava issittup amaruata tumigisimassavai, issittulli amarui allaanerujussuarnik tumeqartarput maani nunami takusimanngisatsinnik, Christine Cuyler oqarpoq.
Qimmilli nujuartat nunatsinni arlalissuit piniarnermik nakkutilliisunit naammattoorneqartarsimapput, taakkulu qimussinut qimuttuusimagaluarlutik tammarsimapput annassimallutilli.