Qimmit amii EU-mut tunineqarsinnaapput

Europa pillugu Folketingimi ataatsimiititaliami ippassaq taama saqqumiiisoqarpoq. Inatsisinut atortitsinermut ministeri, Lene Espersen, ataatsimiititaliami amerlanerussusiivoq, qimmit qitsuillu amiinik -Asiameersunik - EU-mut eqqusseqqusiunnaarnermi.

Eqqusseqqusiunnaarneq Danmarkimi 2003-miilli atuuppoq, nunanullu EU-qarfiusunut

ataatsimoorullugu maanna eqqartorneqalerpoq, EU-p nunalerinermut ministerii Bruxellesimi sapaatip akunnerani tullermi ataatsimiilerpata tamatuma nunat EU-mut ilaasortanut tamanut atuutsinneqalernissaa oqallisigineqassasoq .

Danmarkip siunnersuut tapersersorpaa, pingaaruti-limmik ilassuserlugu, Kalaallit Nunaata EU-mut niuernera siunnersuutip eqqussanngikkaa.

Kalaallit aaqqasiaat, puisit amiinik sanaat, qimmillu amiinik sinaakkusersukkat, EU-mut eqqussuunneqarneri inerteqqutaalissasoralugu kalaallit politikeriisa ernumassutigisimavaat.

Socialdemokratit siunnersuut tapersersorpaat, danskit naalakkersuisuisa Namminersornerullutik Oqartussat soqutigisaat qissimigaarsimammatigik, taama oqarpoq EU-mi oqaaseqartartoq, Svend Auken.

Immikkulli ittunik malittarisassaqartitsinermut, tassa uumasut iluamik paarineqarnissaannut, qimmit qitsuillu atugarissaarnissaannut, Enhedslistimiit tunngaviusumik akerliupput.

Ammit assigiinngissuteqanngillat qimmit, qitsuit imaluunniit nersussuaaqqat savalluunniit amerigaluarpatigik, Enhedslistimi EU pillugu oqaaseqartartoq, Rune Lund taama isumaqarpoq,

Radikalineersullu, Lone Dybkjærip, taanna tapersersorpaa.