Qimmit 600-t Sisimiunut tikissamaalerput

Sisimiuni qimmerpaluk suli sakkortuseriaannartussanngorpoq marsip naalernerani. Avannaatami Qimussersuaqarnissaanut atatillugu qimmit 600-t missaat Sisimiunut tikittussanngorput. Taama illoqarfiup aviiseeraa Sivdlek' allaaserinnippoq.

Avannaata Qimussersua ingerlanneqassaaq arfininngorneq marsip 26-at peqatigiiffik ”Qimusseq” aaqqissuisoralugu.

Aaqqissuisut naatsorsuutigaat qimussit 40-t sukkaniunnersuarmi pingaartinneqartaqisumi sukkanniuteqataajumaartut.

Suliassarli imaannaanngitsussaavoq qimmit 600-t Sisimiunut ingerlanneqartussaassammata. Silaannaap allanngornerata nassataanik qimusserfiusinnaasumik sikoqanngilaq.

- Pisariaqarsinnaavoq angallatit atorlugit qimmit qamutillu Sisimiunut assartorneqarnissaat akisoqisumik timmisartukkut assartuinissaq pinngitsoorniassagaanni, taama Sivdlermut oqarpoq Qimussimi siulittaasoq Villy Olsvig.

Piilersaarutit malillugit qimmit qimussertartullu sukkaniunnissarsuaq sapaatip akunneranik ataatsimik sioqqullugu Sisimiunut tikerassapput nuna sukkaniuffissaq qimmit inuisalu sungiusarfiginiassammassuk.

Unammineq Qeqertarsuarmi siorna ingerlanneqarmat Avannaata Qimussersuani Jørgen Kristensen Ilulissaneersoq ajugaavoq.

Sukkaniunnissarsuaq sioqqullugu illoqarfinni assigiinngitsuni anngunniulluni sukkaniunnerit ingerlanneqaqqaassapput peqataasussat 40-t nassaarineqannginneranni.