QIMMIT NAPPAATAAT Qimmit 51-it toqunneqarput
- Ilulissani qimminik aatsaat taama eqqugaasoqartigisoq takuvara. Ilungersunarpoq, qimminik akiuussutissiinissap tungaatigut qimmillit akornanni ilisimasassat puigorneqarsimasut takussuserneqartoq, Sanne Eline Wennerberg oqarpoq.
Aamma atuaruk Pinngitsaaliissummik kapineqartalernissaat siunnersuutigineqalerpoq
Pissutsillu qanoq aqunniarneqarsinnaanersut nassuiaatigaa.
- Qimminik angalaannartoqassanngilluinnarpoq, ingammik piaqqanik, qimmillu akiuussutissanik kapineqassapput. Taamaalilluta pissutsit aqussinnaalissavagut, Sanne Eline Wennerberg oqarpoq.
Ilulissanili qimmit akornanni pissutsit ilungersunarput. Pisinnaasoq ajornerpaaq uumasut nakorsaata takorloorsinnaalluarpaa.
- Qimuttut annaaneqarnissaat ajornerpaatut takorloorsinnaavara. Kalaallit qimmii immikkuullarissuupput asseqaranilu, kalallillu kinaassusaanut pingaaruteqarluinnartuullutik. Annaassagutsigit alianarluinnassaaq, Sanne Eline Wennerberg oqarpoq.
Tulukkat uloriananngillat
Uumasut nakorsaat eqqissiallannarsinnaasumik Ilulissani qimmilinnut paasissutissaateqarpoq.
- Qimmit nappaataat tulukkanik siaruarneqarsinnaasoq tusatsiagaavoq. Tulugaq soorunalimi tunillaasinnaavoq, tulukkalli qimmeq attorneq-ajorpaa, taamaammat tulukkat annilaangatiginissaat pisariaqanngilaq, Sanne Eline Wennerberg oqarpoq.