Qimminik nivinngarlugit qimitsineq inerteqqutaavoq

- Qimminik nivinngarlugit toqutsineq inerteqqutaavoq, tamannalumi pisariaqanngilluinnarpoq qimminik akeqanngitsumik toqutsisinnaaneq akeqanngitsumik illoqarfimmi neqeroorutaammat. Taama oqarpoq uumasut nakorsaat, Elisabeth Mærsk-Møller, Iluliarmioq naggat gl-imut. Qimmeq nivinnarlugu yoqunneqarsimasoq uumasut nakorsaata naammattoorsimavaa.

- Aatsaat taama pisoqalinngilaq. Qimmit nivinngagaasimasut uumasut nakorsaannit arlaleriarlutik naammattoorneqartareerput, uumasut nakorsaat, Elisabeth Mærsk-Møller oqarpoq, ilanngullugulu oqaluttuaralugu, qimmeq nivinngagaasimasoq kingulleq naammattuukkani tassaasimasoq arnaviaq, piaqqaminik arlalinnik immaqa suli milutsitsisoq.

- Qimmiutillit amerlanerpaatigut utoqqatsissutigisartagaat tassaasarpoq allamik periarfissaqannginnertik. Nunatsinni innuttaasut amerlaqisut aallaaaseqartuupput, taamalu utoqqatsissuteqartarneq eqqumiiginarsinnaavoq, uumasut nakorsaat oqarpoq.

Ilulissat Kommuneat qimminik toqoraasartunik aamma atorfinitsitsinikuuvoq, pisariaqartinneqarpat qimmit sukkasuumik naalliutsinnagillu taakku toqussinnaavaat. Uumasut illersornissaannut inatsimmi paragraf 13 naapertorlugu uumasunik nivinngaaneq inerteqqutaavoq, taamaasiortoqarsimanera paasineqarpat uumasunik naalliutsitsinertut tamanna isigalugu akiliisussanngortitsisoqarsinnaalluni.