Qimmimik mittatiginnittoq Folketingimut apuunneqarpoq
Nuup immikkoortuani Nuussuarmi qimmimik pinngitsaaliilluni atoqateqarsimaneq Folketingimi inatsisinut atortitsinermut ministerimut Brian Mikkelsenimut maanna apeqquteqaatigineqassaaq. Sermitsiap nittartagaani taama allaaserinnittoqarpoq.
Tassa Dansk Folkepartimut ilaasortap Marlene Harpsøep paaserusummagu, pinngitsaaliisup 1000 koruuninik akiligassinneqarnera, inatsisinut atortitsinermut ministerip naammagisimaarneraa.
Taamatut akiligassiisoqarpoq 46-nik ukiullip inissiami atilerisami qimmianik atoqateqarsimanini nassuerutigereeraalu.