Qimmeq terianniamit saassunneqartoq
Saassussineq pivoq sapaammi nukappiaqqat pingasut qimmerlu labradori marlunnik ukiulik Snubbi Nuup ilaata Qinngutta sissaaniitillugit. Tassanngaannaq terianniaq pangalilluni takkuppoq qimmerlu saassunnialerlugu. Nukappiaqqat 10-nik, 11-nik 13-inillu ukiullit qimmeq illersorlugu terianniaq tukeriaqattaarpaat qisummillu anaariartarlugu. Taama nukappiaqqat arnaat Elisabeth Kristensen oqaluttuarpoq.
Qisuk sakkugalugu terianniaq nukappiaqqanit toqunneqarpoq. Terianniarlu politiinut tunniunneqarpoq taakkunanngalu suujunnaarsinneqarluni.
- Soorunami tupassimapput, kisiannili misigisassatut isumaqarfigalugu, oqarpoq.
Nersutit nakorsaqarfiannut pisortaq Sanne Wennerberg naapertorlugu terianniap pissusilersorneratigut takuneqarsinnaasumik perlerortuusimanissaa ilimanarluinnarpoq. Terianniat nalinginnaasumik inunnut ersisarput, teriannialli perlerortut ersigisaaruttarlutik. Nersutit nakorsaqarfiannut pisortaq naapertorlugu Qinngutsinni terinniat tamarmik perlerortuupput.
Qimmeq kiineqarsimanngilaq, taamaattorli perlerornermut akiuussutissamik kapineqarluni sapaatip-akunnerinilu pingasuni immikkoortitaassalluni, Kommuneqarfik Sermersooq tusagassiuutitigut allappoq.
Qinngutsinni najugallit oqartussat qinnuigineqarput terianniat sissueqqullugit, pingaartumik qimmiutillit, taakkulu kaammattorneqarput qimmiminnik pituutaqartitsisaqqullugit teriannianut qaninngoortunut saassusseqqunagit. Kommuneqarfik Sermersooq teriannianik ikilisaasoqarnissaanik neriorsuivoq.
