Qimaasutut isigineqarusuttut ikiorusuppaat
Socialdemokratit, SF-it aamma Enhedslistip folketingimut ilaasortaatitaat arlallit oqarput, Irakimiunik qimaasutut isigineqarusullutik qinnuteqartunut toqqorsimaffiunissartik eqqarsaatigisinnaallugu oqaatigaat. Partiit naalakkersuisuutitaqartut Venstret Konservativillu, illuatungiliuttut siuttuinit erseqqissumik nalunaaruteqartoqarnissaa ujartorpaat, sulimi nalunaaruteqartoqanngimmat.
- Eqqissisimananngitsutut isigaara folketingimut ilaasortat illuatungiliuttuneersut inatsisinik unioqqutitsinissamut piareersimanerarlutik oqarmata, taamatullu inatsisinik unioqqutitsisut paasilluarsinnaanerarlugit oqarlutik, Konservativit siulittaasuat ministeriunerullu tullia Lene Espersen oqarpoq.
Taanna Venstret naalakkersuinikkut oqaaseqartartuanit Peter Christensenimit taperserneqarpoq, taassumami oqaatigaa Socialdemokratit inuutissarsiornermut oqaaseqartartuat Orla Hav aamma SF-it inuussutissanut oqaaseqartartuat Kristen Touborg, nunasiniarlutik qinnuteqartut itigartitaasut ikiorniarlugit inatsisinik unioqqutitsisinnaanertik isertuutinngimmassuk.
Enhedslistit naalakkersuinermut tunngasunut oqaaseqartartuat Johanne Schmidt-Nielsen aamma taamatut iliuuseqarsinnaanerminut piareersimanerarpoq, aamma aviisimi Politikenimi Kristen Touborg issuarneqarpoq, oqarsimanerarneqarluni Irakimiup qimaasutut isigineqarniarluni qinnuteqartup itigartitaasup matumigut kasuttorfigissagaluarpani tikilluaqqukutsuussallugu. Taannami isumaqarpoq, "ilaanneeriarluni inoqatinik pingaartitsinissaq pisariaqartartoq".
Kristen Touborgip taama oqaaseqarnera Villy Søvndalimit SF-illu siuttuinit allanit isumaqatigineqarnersoq paasiuminaappoq. SF-immi siuttui manna tikillugu oqaaseqarumanngittuarsinnarmata.
Pineqartoq oqallisigineqalerpoq, Brorsons Kirkemi palasi Per Ramsdal, Irakimiunik qimaasutut isigineqarusullutik qinnuteqartunut itigartitaasunut toqqortarinnikkusunninni pissutigalugu, sapaatip akunnerini pingasuni sulinngiffeqartitaasussangortitaareersorlu.
