Politeeqarfimmi Juullip ulluata Aappaanni pigaartuusoq, Michael Poulsen, Radioavisimut unnumanna oqarpoq, armeniamiu 40-nik ukiulik Juullikkunni tigummigallagaasimasoq, taannagooq qimaasutut akuerineqarnissaminik qinnuteqarsimavoq.
-Angut taanna Islandikkoorluni Illoqqortoormiunut tikissimavoq, vicepolitikommissær oqaluttuarpoq.
-Allatut iliuusissaqannginnatta angut tigummigallarparput.
40-nik ukiulik killisiorneqareerpoq, Danmarkimilu Københavnip avannaatungaanni qimaasut najugaqarfianni, Sandholmimi, oqartussaasut qanoq iliornissatsinnik paasititsinissaat maanna utaqqiinnarparput, angummi tassunga utertariaqarmat.
-Inatsimmimi allassimavoq, Danmarkimi qimaasutut akuerineqarnissani angutip utaqqisariaqaraa, Michael Poulsen Illoqqortoormiut politeeqarfianni pigaartuusoq oqarpoq.