Qimaasut pillugit akuliukkusupput
Apeqqut danskit nunamik iluani pissutsinut tunngasutut kisimik isummersorfigissagaanni, taamalu kalaallit savalimmiormiullu qinigaasa akuliuffissarinngisaattut, isumaqarneq piumasaarsorneruvoq.
Qimaasunut nunasiniartunullu naalakkersuinikkut oqartussaaneq danskit naalakkersuisuisa, Folketingillu killilimmik, naalagaaffeqatigiinneq sinnerlugu oqartussaaffiisa ilagaat.
Namminersorneq pillugu Isumalioqatigiissitap apeqqut isummersorfigereerpaa. Inassutigineqartorlu tassa oqartussaaffiup Namminersornerup atuutilernerani tunniunneqarnissaa.
Apeqqummut pineqartumut qitiulluinnartoq tassaavoq, inoqatinut atugarliungaartunut qanoq isiginneriaaseqarneq.
Taama tunngaviusumik isummerfigisariaqakkanut nunarsuarmioqataasutullu susassaqqarfitsinnut nunatsinni mattullutalusooq isummersortussaanngilagut – apeqqut pineqartoq uagutsinnut inuiattut aammali nunarsuarmioqataasutut isummerfigineqartussaammat. Suliassarrlu taamaattoq isumatunerpaamik isumagineqarsinnaavoq nunat tamat akornanni suleqatigiinnikkut, tamatsinnit peqataaffigineqarluni, IA-mut ilaasortat marluk oqarput.
