Qimaasunik tikilluaqquserusussinnaasut

Kalaallit Nunaanni kommunit arlallit qimaasunik tikkilluaqqusinissaminnik piareersimapput, AG ullumi saqqummersoq taamatut allaaserisaqarpoq.

Paamiuni qimaasut inissaqartinnissaat periarfissaavoq, borgmester Lars Sørensenillu periarfissaq assortunngilaa, naalakkersuisulli aalajangiisussaanerat erseqqissarlugu.

Paamiuni nunasisimasunik arlalinnik peqarpoq soorlu Thailandimiut russillu. Nunat allamiunik nunaqqatitaartarnerput misilittagaqarfigaarput, borgmester Lars Sørensen AG-mut oqarpoq.

Nanortallip kommuneani borgmesteri Kristine Raahauge, nuna allamiut kommunimut nunasisinnaanerannut assortuinngilaq.

Nunat allamiut ilinniagaqartut kommunimi suliffeqarfinni amigaatigineqartuni sulilersinnaanissaannut tikilluaqquagut, Kristine Raahauge oqarpoq.

Uummannap kommuneani borgmesteri Jens Lars Fleischer nunat allamiut Uummannamut nunasisinnaanerannik apeqqummut nangaavoq.

Uummannami inissaaleqisoqarpallaanngikkaluarpoq, issittorujussuusinnaavorli, aammalu qimaasut kalaallisut qallunaatulluunniit oqalussinnaanngippata ajornartorsiortorujussuussapput, Jens Lars Fleischer oqarpoq.